版主感想

海上狂歡純情不再

踏入鬼月，呢排唔知有乜古怪，遊船河之嘛，已經浸死咗好幾個人，簡直好似睇緊電影《死神來了》咁，一個死完又一個，認真得人驚。

不過死神都係打份工嘅啫，如果唔係有人做埋啲唔要命嘅嘢，佢一般都隻眼開隻眼閉。咁又奇嘞，小白老弟翻查一下玩命X-Game名冊，當中滑板、花式滑浪、攀岩、衝浪、風箏衝浪，就係唔見有遊船河，既然唔算係極限運動，因乜事會死得人多呢？

聽聞依家嘅船河唔似舊時咁，開幾支一公升汽水，食餐肉腸仔麵包咁純情㗎喇，隊酒索K，幾乎已經係指定動作。當局實在好應該規管一下，正如當年長洲冧包山，話之你係乜嘢民間傳統習俗吖，港英政府話禁就禁，嗱，呢啲咪叫強政勵治囉！

網友回應......

穎兒

遊船河唔落水咪玩開心囉，都係喺船上吹吓海風，睇吓海景，穩陣又開心！

奧利花

你都咪話唔信邪，七月節梗係多古怪嘢，就算游泳健將無端端都可以出事㗎。都係玩少啲為妙。

laughing gor

出到海，大家見到個海就興奮晒，唔理三七二十一，即跳入個海度係咁游，熱身又唔做，仲以為自己裝咗摩打咁，梗係出事啦！

紅番薯

遊船河，好多時個個都係暢飲豪食，啲後生仲興埋索K船河，你話想唔出事都幾難。

冒險號

我就話咩都唔使驚，只要自己小心做好準備，最多咪攬兩個水泡落水囉！

貞姐

船河又熱又曬，好彩我唔鍾意，唔會玩！

小齊

計我話，規定一定要有合資格救生員跟船先可出船遊船河，有咩事都即刻有最先救援吖，咁咪安心好多囉。

神婆

神婆話齋，盂蘭節，拜咗神燒咗街衣先至好去遊船河出夜街，安心啲！

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com