「肥仔張」張宇人同太太早前跟富貴黨遊西藏後，尋日又孖公仔咁出席電台嘅周年酒會。講起西藏之行有乜奇遇時，佢爭住認叻，話體質出奇地Fit，皆因得到一位西醫老友相助，配定幾粒降血壓藥畀佢傍身，結果佢同太太去到西藏高原仍然氣定神閒。導遊本來力勸佢飛抵拉薩後，抖番幾粒鐘先好出去逛，點知佢拍拍心口話唔使，隨即會合大隊四出遊覽寺廟，導遊睇見都嚇咗一跳。
肥仔張喺西藏紮紮跳，仲做埋「零食大使」，將幾大袋預先準備好嘅陳皮梅、薑、軟糖、杧果糖等派街坊，搞到成班黨友全程圍住佢攞糖食。佢沾沾自喜咁話：「我話晒係立法會飲食界代表，想『搵食』梗係搵我啦！」竟然又賣廣告。
