尋日有場施政報告諮詢會專門聽取婦女、青年同安老服務界嘅意見，當中包括婦女事務委員會主席Sophia高靜芝。Sophia喺會後話依家香港參與官方諮詢組織嘅女性得兩成七，比例少過國際標準嘅三成，咪當面同政務司司長唐唐講希望加番多啲比例囉！

Sophia擺明詐型啦，話政府未達標之餘，仲唔滿意政府唔多重視女性。

政府早前話要搞六大產業，Sophia覺得呢啲係知識型經濟，佢反而好關注基層婦女嘅就業問題，覺得無論環保工作或者政府有意發展嘅私家醫院，都有適合婦女嘅工種，政府應該考慮多啲，佢甚至建議政府成立婦女發展基金，為婦女組織提供資源服務社會。

老實講，政府以前話制訂任何政策都要加入政治角度，想市民容易啲接納政府嘅政策，聽完Sophia咁講，似乎係叫政府日後考慮任何政策時，唔該加埋婦女嘅角度。唐唐，收到未？