立法會海濱規劃事宜小組委員會早喺七月休會前，已計劃用公費外訪考察其他國家嘅海濱規劃同管理。經過多番討論後，最後決定喺九月二十五號至十月三號，馬拉松式出訪美國嘅紐約、波士頓、巴爾的摩同加拿大嘅溫哥華。

估計成個行程每名議員嘅開支需要三萬七千蚊（經濟客位）至高達九萬蚊（商務客位），分分鐘仲貴過喺九月中進行嘅東歐三國豪華團。

但委員會最近開會敲定細節安排時，接連收到幾位報咗名嘅團員申請退團，最後七名團友竟然有四個放飛機。最慘係委員會已初步聯絡咗四個外訪城市嘅政府同相關團體，如果最後得番三個人去，真係失禮死人。唯一慶幸係立法會秘書處仲未幫佢哋訂酒店同機票，就算真係去唔成或少咗人去，都唔會構成浪費公帑。

或改檔期望回心轉意

據聞部分團友臨時甩底嘅原因，係喺報團時冇為意今次行程跨越咗「十．一」，到時佢哋肯定忙於出席各項活動同酒會，可能分唔到身。四名甩底議員包括建制派嘅霍震霆同石禮謙，仲有泛民主派嘅涂謹申同陳偉業，阿涂自爆為忙於籌備喺年底舉行嘅婚禮先被迫退團，其餘三人邊啲係因為「十．一」而放飛機，大家應該唔難估到。

委員會主席劉秀成話紐約方面已表明九月底至十月初有好多嘢做，未必得閒招呼佢哋，其中一個方案係取消去紐約，將行程縮短到「十．一」前結束，希望部分團友可回心轉意；另一方案係將外訪押後到農曆年假期舉行，等多啲議員有空檔報團喎！