等太一叮講句公道話，科技發展日新月異，無非為咗改善生活，如果科研成果可以化為商品，本來就真係財源滾滾、大有可為。就好似嗰個以色列咁，建國只有六十一年，人口同香港差唔多，但係就位處中東，沙漠佔去一半，水面積唔夠百分之一，天然資源有限，再加上周圍都係回教國家，連年疲於征戰，生存環境極之惡劣。雖然係咁，但人哋識得發展高科技，靠腦搵食，結果經濟嘭嘭聲發展，國民收入嘭嘭聲咁升，時至今日，以色列嘅人均收入已經高過香港。

只不過，中國人有句話講得好，種瓜得瓜，種豆得豆，創新科技雖然錢途無限，仲要睇你點樣耕耘。港府講科技港、數碼港講咗咁多年，講到聲嘶力竭，講到口水都乾，但係本地科研投放就只有總產值百分之零點八咁大把，喺亞洲四小龍中敬陪末席，而人哋嘅投放率一般係百分之二以上。咁嘅牌面，唔輸甩褲都偷笑，港府仲想喺區域競爭中跑出，太一叮只好贈佢一個O形嘴。

而令人笑爆嘴嘅係，港府又真係好天真、好傻咁認為有得贏喎。朱經武又話嘞，港府投資科研急功近利，勁無耐性，日日問你有乜好嘢。喂，係人都知科研係長線投資啦，人哋高錕發明光纖都要到幾十年後至廣泛應用，而你班官老爺三日兩頭走去問人有乜成果，即係話你今日先至播種，而且種嘅明明係一粒芝麻，但轉個頭就想收番個西瓜，而且仲要日日嘈、日日叫，一係令人煩不勝煩，二係令人大開眼界。

所以呢，太一叮都好佩服啲科研人員㗎，經費得嗰雞碎咁多，仲可以搞出啲舉世矚目嘅產品。呢，舊年京奧開幕禮咪有幅巨型長城水墨畫嘅，就係用科大博士朱紹恆研發嘅「墨戲」畫出嚟㗎。仲有呀，舊年四川大地震，科大研究生汪滔嘅自動導航模型直升機幫手拍攝災後影像，真係犀飛利㗎！

之但係，咁又點呢？港府唔識寶，成日將啲研究成果拱手讓人。譬如科大有位教授研究納米應用，同台灣合作試驗手機式放映機，後來又得到內地企業投資，科大只佔部分股份，朱經武好谷氣咁話，如果港府肯幫手，咁就全部股份都係我哋嘅。

唉，都話時勢造英雄，諗番香港由一個小漁村發展成今日嘅國際都會，關鍵都係把握時勢、努力拚搏，家陣全球發展知識經濟，大搞高新科技，而港府就一味得個吹字，放軟科研發展嘅手腳。再咁落去，香港遲早變番個漁村。

喺咁嘅情況下，煲呔曾又嚟吹出個六大產業嘅口水波，話可以靠創新科技走出經濟困境喎。唔好玩啦煲呔曾，信你半成都死，睇住太一叮叮爆你個鎯鎯，叮！