應向人類後生仔女學習

海洋公園正準備幫大熊貓樂樂同盈盈生番個BB，問題係大熊貓呢種動物好奇怪，唔學得似時下嘅後生仔女咁，郁啲就埋牙，大咗肚喺廁所生埋都唔知。原來大熊貓發情期超短，想要靠佢哋自自然然交配唔係一件易事，若果仲要一索得B，更加係難上加難。老老實實，大熊貓如果唔係有人類當佢哋係寶，絕咗種九世啦，冇辦法，鬼叫佢哋升上神枱，做咗世界第一大強國嘅國寶咩！

咁到底有乜方法可以幫吓兩隻巨獸行埋呢？小白老弟認為佢哋懶於搞嘢，係因為一路以嚟冇適當嘅性教育，應該搵啲挑情寶鑑引吓佢哋，拍番套大熊貓A片，由幾個特區高官粉墨登場，着住套黑白毛毛大熊貓公仔戲服大戰三百回合，示範各種高難度動作，睇到樂樂盈盈慾火焚身，咁就買定BB床都得嘞。

網友回應...X）...

[　Roy　]

日播夜播四級鹹片畀佢哋睇，不分類別，梗有一款啱口味。

[　瞄瞄　]

試吓香薰催情吖，可能對熊貓都有效。

[　喜盈　]

最好都係播「四仔」啦，同埋貼滿晒交配圖，等佢哋有樣學樣。

[　小英　]

長期搵人睇住熊貓女，一有咩異樣想交配，就推熊貓仔過去。

[　Janet　]

我認為發情期時熊貓館要閉館，等樂樂盈盈可舒舒服服咁造B。

[　小熊貓　]

放佢哋三個月有薪大假連機票食宿三餐唔憂，咁先有心情嘛！

[　光榮　]

叫營養師畀多幾餐催情餐佢哋食，熊貓仔先有機會o架嘛。

[　發仔　]

請性專家教吓樂樂盈盈，唔知有冇用呢，起碼教吓pose都好吖。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。 網址：www.sunsiupak.blogspot.com