尋日約有八十名港區全國政協出席施政報告嘅諮詢會，會後啲政協隨即鳥獸散，肯開金口亦語調溫和。若果以為煲呔曾就此過骨，就大錯特錯嘞。據與會者講，煲呔曾喺開場白開宗明義希望大家集中就六大產業發表意見，以為呢啲畀面派對，安穩坐到夠鐘就收工，點知羅祥國殺煲呔曾一個措手不及。
本身係香港政策研究所首席經濟顧問嘅羅祥國即場向煲呔曾發炮，指六大產業屬產業經濟政策，外國推行產業經濟必先定下三大指標，對就業、稅收同GDP嘅影響，有呢啲量化數據先可以制訂相應嘅配套措施，好似投入幾多資源同人才培訓方向咁，但政府話要發展六大產業已幾個月，竟然提都唔提呢啲數據，簡直不可思議！佢仲叫煲呔曾「交數」，但煲呔曾聲都唔聲，唔知係咪畀羅祥國嘅突襲嚇窒咗。有政協講笑話，羅祥國真係幫政協爭一口氣。
事後問番羅祥國，佢直言唔睇好六大產業，質疑今時今日嘅香港經濟格局，同十年前冇分別，六大產業最終會淪為中藥港同鮮花港翻版，建議政府三思而後行。佢證實煲呔曾喺會上冇回應佢嘅提問，仲大膽推斷煲呔曾根本冇數據喺手。