早前正生書院獲傳媒熱捧，多名高官、名人同立法會議員亦借機揩油水，紛紛公開力撐正生，但最近正生鬧出種種是非，甚至被廉署調查後，呢班人好多都立即潛晒水，足見人情冷暖。咁之前喺電台聲淚俱下力撐正生嘅前高官馬時亨又點呢？
尋日咁啱撞到肥亨同太太撐枱腳（圖），講到近日正生書院嘅風風雨雨時，佢自言唔熟悉正生嘅具體運作，好難作出評論，但就強調自己唔會收回早前喺電台發表嘅言論，因為佢由始至終力撐嘅係正生學生，而唔係撐營運正生嘅機構或支持佢哋搬竇。
佢又話知道有唔少商界朋友都受到佢感動，自發捐錢支持正生，但澄清佢本身並冇捐到錢，又話不論正生事件之後點發展，都唔關班正生學生嘅事，社會一定要繼續力撐呢批曾誤入歧途嘅後生仔，畀個機會佢哋改過自新。