近日佢因狂踩校園自願驗毒計劃而聲名大噪，但尋日就自爆唔少人讀錯佢個名，呢個名仲帶畀佢唔少麻煩添！查實個「壎」字讀音同「圈」字相同，但唔少人有邊讀邊，錯將佢叫做王桂「熏」。由於工作關係，佢由八十年代起成日中港兩邊走，大概一個禮拜去上海兩至三次公幹，點知個「壎」字喺內地出入境部門嘅電腦顯示唔到，所以佢每次都要搞一大輪先確認到身份。

為咗過關暢通無阻，佢的起心肝搵出「壎」字嘅同音、同義異體字，仲攞埋本字典上中旅社舌累職員畀佢改名，最終成功將回鄉證嘅名改做王桂「塤」。

咪以為可以自此安枕無憂，佢最近想攞上海部老爺車去劏時，又畀個名玩起，因為當地劏車要對番車輛登記人嘅姓名，就因為佢回鄉證個名改咗，結果人哋唔肯幫佢劏車。