「女電王」、中電常務董事阮蘇少湄尋日主動透過中電公關發布消息，話自己近月經診斷後證實患上乳癌。消息傳出後，外界為之嘩然。統領逾四千二百名員工嘅阮太係中電百年嚟首位女當家，處事以果斷、有效率見稱，估唔到處理患病消息都快人一步，寧願自己爆料，都唔想外界胡亂猜測。
年屆五十歲嘅阮太多次代表公司就電費問題同政府談判，詞鋒銳利，傑出女性形象深入民心。雖然多嘢做，佢拒絕做工作狂，多年嚟堅持七點放工，早睡早起，飲食清淡，今次患病，同事都戥佢擔心。不過阮太就好樂觀，話有信心會醫番好，又話暫停職務唔會影響公司運作。至於佢去邊度醫病，公關話係阮太私隱。
阮太今次休假屬暫時性質，康復後會重返崗位，但治療需時，暫時未知放幾耐假，而中電亦搵咗人暫時頂替佢嘅工作。