施政報告未出爐就搞成咁，公布之後實在難以想像，尤其事前落區搞嘅大型諮詢，肯定畀市民鬧到反艇。點知特首辦尋日話，煲呔曾唔會再主持地區大型諮詢會，改由一班副局長同政治助理輪流落十八區做諮詢。

收料摸底兼護主

老實講，副局長同政治助理自去年中上任後，一直被外界狠批人工高，物非所值，乜都做唔到，但就頻頻爆出醜聞，可以預料佢哋落區肯定畀人鬧鑊勁，再加埋煲呔曾近年施政倒行逆施，呢班爛頭蟀落到區肯定成為市民宣洩不滿嘅出氣沙包，收料摸底之餘仲做埋箭靶護主，煲呔曾呢招認真夠毒。

煲呔曾舊年發表施政報告後，下令班副局長輪流落區聽取市民意見，點知個個都按本子辦事，當市民問題脫離佢哋所負責嘅政策範疇時，就只係擘大口得個窿。

經過連串甩轆事件後，今年佢哋落區好明顯經過精心部署。好似南區港鐵工程涉及環保問題，舊年環境局副局長潘潔就畀居民問到口啞啞，今年就改由運輸及房屋局副局長邱誠武應付；又例如厭惡性設施共冶一爐嘅屯門區，舊年由食物及衞生局副局長梁卓偉掛帥，今年就交由專責環境嘅潘潔去，睇怕好多區內人士等住「招呼」佢；至於流動人口較多嘅灣仔區同作為經濟核心嘅中西區，則交由商務及經濟發展局副局長蘇錦樑負責。

教育局副局長陳維安就繼續落大埔，而大埔區中學喺年底推行校園驗毒試行計劃，但計劃近期被批評得體無完膚，有人預計好可能爛尾，睇怕佢落到去都唔會好過！