咦，唔係喎，日前喺勞動市場失驚無神爆出咗一千五百個職位空缺，唔通今次政府真係轉死性，全力催谷被稱為「吹水會」嘅經濟機遇委員會所提出嘅「六大優勢產業」，眨吓眼就真係創造出咁多就業機會？

叮，唔好發開口夢啦，查實因為馬季就快開鑼，香港賽馬會特別為天水圍電話投注中心創造出一千五百個就業機會呀！計太一叮話齋，六大優勢產業只聞樓梯響，等十年八載都未必成事呀！

講番今次招聘會，依然人頭湧湧，據講吸引咗二千八百人申請，場面墟冚，幾乎逼爆會場。唔好以為天水圍冇雷公咁遠，只係吸引到區內居民爭住去搵工喎。唔係講笑，唔少住市區嘅求職者，莫講話係天水圍吖，就算係天山有工做，唔理山長水遠都要去碰吓運氣啦，叮！搵工大過天呀！

呢嗱，有一位住喺港島區嘅陳先生，就特登去到天水圍招聘會應徵，佢話由於已經待業咗一段長時間，唔想太耐冇嘢做，已將薪金要求調低三成，依然冇乜回音。依家但求搵到份工做，希望盡快重投勞動市場。可想而知，今時今日搵食係幾咁艱難吖。

事實上，今次馬會提供嘅職位空缺只屬於兼職職位，但冇計啦，本港經濟大環境仲未復甦，為咗生活，兼職都殺住先。不過話就話係兼職工作，原來一啲都唔易㗎，由於競爭激烈，求職者面試時要過五關斬六將，既要進行小組討論，又要進行聆聽以及數字輸入等多項測試，真係少啲技能都唔掂。

當然啦，呢批職位空缺嘅時薪有四十一至四十七元不等，睇番依家嘅市價，連鎖快餐店嘅平均時薪知唔知有幾多呀？得二十元咁大把㗎咋，所以馬會呢份可以講得上係筍工，梗係爭崩頭啦！

講開又講，本港失業人口超過二十萬，就算有豐富工作經驗嘅打工仔，失咗業要搵番工都唔易，何況係一啲低年齡、低學歷及低經驗嘅「三低」青少年，佢哋更加難喺勞動市場同人競爭啦。呢嗱，據政府公布嘅就業數據顯示，十五至十九歲青少年嘅失業率超過兩成，證明情況非常嚴重。

弊在當局對佢哋嘅就業問題視而不見，一味只係派「毅進」、「展翅計劃」呢啲水泡，點知當中好多都係漏氣嘅，課程有姿勢冇實際，讀完對搵工毫無幫助，唯一嘅用途只不過係為咗拉低失業率，公布出嚟嘅就業數字好睇啲啫。

叮！唔使多介紹，講到勞工就業問題，當然要請勞工及福利局局長張建宗出嚟啦。不過今次太一叮唔係要叮爆佢，而係想佢唔好再匿喺辦公室歎冷氣，搵一日親身試吓好天曬落雨淋排隊搵工嘅滋味，等佢明白乜嘢叫搵食艱難呀！