一姐吐氣揚眉

某個識寫字嘅才女明星確診中招，雖然呢位姐姐仔寫嘢攞唔到文學獎，拍戲封唔到影后，唱歌亦未到樂壇阿姐級，終日獨家試愛，行行企企，始終都唔係辦法o架，不過如今絕處逢生，終於可以成為娛樂圈豬流感一姐，總算係吐氣揚眉出晒位啦。

話時話，如果呢位女星有得揀嘅話，小弟建議最好唔揀豬流感囉，因為外國娛樂圈都有人中招，執人二攤，畀人話抄襲就唔好啦。

而且個「豬」字筆畫實在太多，結構又異常複雜，好易寫錯為「煮流感」呀、「音流感」呀，無謂又畀人捉錯字。不如咁啦，搵周一嶽傾傾，佢哋嘅醫療失誤專業夠晒權威，即刻改口話斷錯症，原來係世界首宗「文盲流感」個案至真，你話幾威呢！

網友回應

士爹利

嘩，才女呢個月出席咁多公眾活動，見過才女嘅藝人都要去驗一驗啦，話晒公眾人物係最高危傳播病毒工具呀。

肥強

才女新聞一單勁過一單，史無前例，唔通才女鋪排好晒季節性新聞？

Vicki

做唔到g模第一，都要搵番個名，等人記得一代錯百字才女，依家畀佢爭到個娛圈豬流感第一，真係辛苦晒。

Demio

我覺得如果有隻叫「人頭豬腦炎」，一定好易喺香港官場蔓延。

小人物

雖然字唔係識得好多，歌我亦未必聽得入耳，不過都希望佢早日好番啦～

阿Wing

一傳十，十傳百，容乜易成個娛樂圈都要隔離o架，到時咪冇得睇Live囉！

少爺仔

嘩，咁大隻豬周圍走，有病徵就唔好出嚟做show啦，為人為己返屋企抖吓吖嘛！依家日日都咁多病例，真係要少啲出街。

MM

才女可能成日要查字典，太過辛苦，捱壞身體都唔定。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。 網址：www.sunsiupak.blogspot.com