距離下屆區議會選舉仲有兩年幾，但大部分黨派早就做晒部署。雖然經濟動力講明主打工商經濟，唔會學富貴黨咁畀地區直選利益牽住鼻子走，但要成為真正有實力嘅政團，點可以一啲地區影響力都冇？
不過，佢哋現有喺富貴黨挖角得嚟嘅兩名區議員羅煌楓同李漢城，都係嚟自工商界嘅委任議員，缺乏直選經驗同地區實力，其他成員亦冇搞開呢啲嘢，由頭重新做起要好多時間，惟有又要用番以前富貴黨嗰套羅致現成區議員嘅策略，即係「收購」囉。
據聞，佢哋由「新界王」劉皇發出馬，已先後游說多名現任區議員加盟，直選同委任嘅都有，包括本身係律師嘅資深沙田區議員簡松年，同以前都畀富貴黨以同一手法羅致嘅中西區區議會主席陳特楚、元朗區議員袁敏兒等，但暫時都未聽聞有人答應。
有富貴黨前成員話「收購」區議員純粹基於短期嘅政治利益，雙方關係好難持久，連富貴黨都已經明白行唔通，近年都好少再用，經濟動力又走番呢條舊路，有冇前途都好明顯啦。