立法會喺暑假休會，係高官放大假嘅黃金檔期，外號「騰雞美華」嘅民政事務總署署長陳甘美華，本來想喺六月中至七月底，分三次放差不多一個月大假，乘機充充電，但好可能因為酷愛做騷嘅煲呔曾喺暑假大搞禁毒騷，搞到陳太不得不乖乖哋留守崗位，避免十八區民政事務處群龍無首。
陳太尋日現身仁濟醫院活動，問起今年暑假係咪提早完咗，佢即刻提高聲調話要「返嚟做嘢」；再問係咪要幫手搞禁毒呢？佢就神色一變，解釋禁毒係禁毒處搞o架嘛，佢哋只係配合，總之希望青少年唔好吸毒啦！
眼見佢變得愈嚟愈緊張，於是將話題一轉，問吓呢幾日天氣酷熱，民政事務總署已連續幾日要開避暑中心，究竟中心有乜嘢消暑良品呢？佢終於露出笑容，推介中心入面有最健康嘅嘢。係乜嚟？原來係清水！然後陳太就雞咁腳走人。
問心嗰句，提早銷假又有乜機密呢？避暑中心消暑良品更加毫無敏感可言，都唔知「騰雞美華」為乜咁「騰雞」？