早前富貴黨去西藏腦震盪，田太陪老公田北俊一齊去，點知喺火車車廂感染傷風，返嚟咁耐都未好，前日中午喺中環就撞到佢啱啱睇完中醫，但冇即刻返山頂屋企休息，反而趕去置地廣場嘅超市。
買乜嘢咁緊張？田太買咗稞麥麵包同朱古力鬆餅，原來朱古力鬆餅係田少嘅至愛，田太簡直係廿四孝老婆。見佢攞住環保袋，問有乜好嘢煮畀田少食？佢謙稱係「無飯煮婦」，落廚非佢強項，但總有幾味撒手鐧嘅。
田少後生時追瘦田太，終於抱得美人歸，邊捨得田太操勞揸鑊鏟吖，反而田少最近傳出重返富貴黨幫手，以後可能又少咗時間陪老婆就真。田太就話，從來唔過問田少嘅事，對佢從政一直都冇意見。其實田太唔反對就即係支持啦！
