之前官職唔使拋頭露面

梗係啦，正生學生攞綜援嘅問題已經畀傳媒追到瘦，點知前日又發生天水圍大細孖慘劇，跟住仲被揭發安老院雜費等問題，突然間殺出兩宗突發事件，仲一齊撲埋佢身上，上任只有七日貨仔嘅Patrick講嘢唔敢越雷池半步，啲答案同早前社署出過嘅新聞稿差唔多，而且答法比較官腔，雖然未去到「人肉錄音機」咁嚴重，但好明顯事前背書背得好熟。

佢表現生硬咗啲，好可能同之前做過嘅官職有關，佢做過嘅衞生及福利局副局長、駐京辦副主任，以至上一份食物及衞生局副秘書長（衞生），都係做幕後工作，兼且政策較多，就算係豬流感咁嚴重，佢都唔使出嚟拋頭露面，有乜都係問責制嘅食衞局局長同副局出嚟頂住。簡單啲嚟講，Patrick之前就喺幕後密密做，到依家要站出台前，仲要企喺最前線，去到邊都會成為焦點，查實邊有咁快適應到吖！

其實佢都算係個勤力嘅官，知道天水圍係重災區，上任第三日佢就落咗天水圍視察，呢種自動自覺並唔係個個官都有。之不過，社署涉獵嘅範圍咁廣泛，突發事件又多，依家已經有三單唔同性質嘅事件要處理，其他炸彈都唔知幾時再爆。所以講真嗰句，淨係得三耳四眼邊夠吖，睇嚟Patrick真係要有三頭六臂，隨時接炸彈先得。