本文重點
版主 : 小白
眼不見為乾淨
控煙呢家嘢真係唔容易,去到啲夜場遇到啲三山五嶽嘅人,記住喎,着住件黑色背心寫明「反黑組」都未必壓得住場,靠幾個書生控煙,反過嚟畀人夾住要幫阿乜哥點煙,「控煙辦」變「點煙辦」,認真失禮。據聞有啲諗住棄暗投明走去賣煙,真係好有遠見!
不過唔使驚,由下個月開始,唔單止控煙辦可以執法,連康文署一樣可以喺佢哋負責嘅地盤捉煙鏟,弊在懶慣嘅康文署員工好驚青,擔心執法時會畀人打,打算抗爭到底咁話。
其實使鬼撐咩,康文署管樹咁耐,只有小市民中招,從來冇試過有康文署員工畀樹壓死,可見署方呢套「君子不立危樹之下」幾使得。今次大可改用「君子遠煙民」,棵樹畀蟲蝕到空心都話「冇即時危險」,更何況聽講食煙食十幾年至有肺癌,當然可以唔理啦!
網友回應...X)...
[俊文]
遲啲康文署、食環署、房屋署實好多職位空缺。
[小露寶]
冇事嘅,你知道嘛,康文署、食環署職業技能係最識卸膊。
[傑爺]
嘿!一定雞手鴨腳啦!沙灘我都見有人食煙啦,冇人理嘅。
[Katherine]
嘻,食環署嘅人大部分去咗蛇王,見唔到捉唔到,未驚過。
[祥仔]
以後搵地方歎支煙都難,有得畀人買,又唔畀人食,虐待咩!
[小肥]
會唔會喺街邊垃圾桶煲煙都話係食環署管轄範圍照畀牛肉乾㗎?
[藍莓]
多幾個乜署物署控煙,我估都係冇用,得把聲。
[小不點]
聽聞控煙辦人工唔錯,如果有埋支炮傍身,我都仆到去做呀!