早前「阿魚」余志穩正式退休，而原屬首長級第四級嘅食物及衞生局副秘書長聶德權本周一正式「升職」，出任屬首長級第六級嘅社署署長，佢尋日選擇喺一間青協營辦嘅咖啡店同傳媒傾偈。
佢話做到呢個位好開心，雖然責任重大同充滿挑戰，仲解構自己，話好在姓「聶」有三隻耳朵，可以聆聽各方意見，又話自己戴眼鏡，有四隻眼，有助佢多睇多了解，講到仲勁過「十兄弟」嘅順風耳同千里眼咁。不過佢冇提及做官嘅有兩個口喎！
話口未完，被問及正生學生申領綜援嘅問題時，佢猶豫咗一陣，然後以官腔回應，話一切會跟既定程序處理。跟住又有人問到，阿魚在任時民望甚高，會否為佢帶嚟壓力？佢話早就預咗做得唔好會畀人鬧，但就拍心口話無論未來面對乜嘢挑戰，都會盡力去做好份工，同持份者多啲溝通，就社會需求作出適切安排咁話。
依家佢派晒定心丸，究竟日後會唔會言行一致，就要聽其言，觀其行嘞！