克勤仔話細個時正值本港工業起飛嘅日子,佢屋企同好多家庭一樣都會喺工廠攞貨返屋企加工,所以佢讀小學時已晚晚幫手穿拉鏈同裝嵌玩具嚟幫補家計。到咗讀小六時,佢仲好大膽咁去工廠搵暑期工,做童工當然係犯法啦,但玩具廠老闆一於少理,照請可也,叫佢哋去工廠後巷開工,負責打窩釘。