我哋接到投訴，投訴人話金管局係公營機構，唔可以隨便安插人入金管局做嘢，如果局內有空缺，應由內部物色人選，搵唔到先至對外招聘。投訴人指候任總裁攞命陳為咗要帶自己嘅秘書入金管局繼續為佢効勞，不顧既有制度，登報請人，用意非常明顯。

據投訴人報料，事件中呢位疑似內定入金管局嘅人，正係攞命陳當年離開金管局後，去渣打銀行打工時嘅秘書，其後攞命陳做特首辦主任，亦帶埋佢過去。

投訴人仲話攞命陳為免事件張揚，登報招聘嘅職位名稱只係用「Senior Officer」，而唔係打正旗號用秘書相關嘅職銜，而公司將會成立遴選委員會進行面試，做場大龍鳳嚟掩飾。雖然金管局歡迎內部同事申請，但大家都知乜嘢一回事，所以冇人願意做花瓶陪跑。

金管局回應話，依家確實正招聘高級主任一職，但強調金管局每個職位嘅填補，都由一個特設嘅招聘小組負責挑選合適人選，根據個別情況，了解應徵者係咪合適同勝任有關工作，又話登廣告係其中一個招聘程序。而登廣告用咗幾多錢，金管局就不作評論，亦唔會就個別應徵者嘅資料作評論。