尋日，新界的士司機權益組織同街坊工友組織一共十幾人喺大埔一個的士站示威，抗議政府立法強制駕駛人士停車熄匙。佢哋批評當局罔顧司機健康夾硬嚟，唔單止要司機大熱天時喺架的士入面「焗桑拿」，仲影響市民搭的士嘅意欲同司機生計。

司機權益組織負責人話，佢哋尋日將架的士停車熄匙泊喺烈日下曬半粒鐘，車廂入面嘅溫度居然高達四十度，比人嘅正常體溫仲高幾度。喺咁嘅環境下熄匙等客，架的士未撻番着，揸車嗰個都已經暈低先啦。

高溫固然恐怖，落雨一樣唔掂。開窗畀雨水撇濕座位，乘客隨時詐型；閂埋窗實聽自己焗餐死。總之一句講晒，停車熄匙呢條屎橋直情係靠害。的士大佬一致要求環境局豁免業界停車熄匙。佢哋仲「懇請」政府高官試吓暑天唔開冷氣，落雨唔閂車窗，親身體驗吓呢項擾民措施嘅滋味。

啱數吖！嗱，環境局局長邱騰華咪又詐傻扮懵囉，人哋的士司機日日喺出面捱世界，標晒汗，你就鬼咁梳乎，坐喺冷氣房諗屎橋搞搞震，唔怪得司機大佬仲興過個日頭啦。

叮！查實呢個政府不過係「忽然地球之友」，停車熄匙更加係無計可施夾硬嚟、有姿勢冇實際嘅代表作。咁多年來，政府環保口號嗌咗唔少，推出嘅環保措施加加埋埋仲厚過本電話簿，但空氣污染就愈來愈嚴重。

本港空氣差成點？睇吓全年低能見度時數咪知囉，上世紀九十年代係三百幾小時，到咗二○○七年，數字居然暴升咗三倍幾，有差唔多一千三百個小時。空氣質素有冇改善，正一單眼佬睇老婆，一眼望晒啦。

政府自己乜都做唔成，至叻就係攞內地嚟過橋，粵港合作、共享藍天，講來講去得個吉，市民睇唔到有乜實際效果。呢嗱，前日喺最新嘅粵港合作協議度，政府又齋噏一輪「致力改善區域空氣質素、推動資源循環利用」嘅廢話，仲話要搞個「粵港清潔生產夥伴」標誌計劃添，但實質措施一樣都攞唔出。

叮！呢個政府除咗吹水，仲有邊樣掂吖？乜鬼「藍天行動」、「綠色大珠三角優質生活圈」，唔識就畀佢嚇死，識就畀佢笑死。減排唔達標，空氣仲差過舊時，藍天好似阿崩叫狗咁，愈叫愈走；優質生活圈同樣搞嘢，粵港合作貌合神離，講多過做，幾時真係拍檔做到嘢，睇怕政府自己都冇底啦。

叮佢個鎯鎯！藍天唔見晒，綠色生活又唔知幾時至出現，政府攞張咁嘅「成績單」嚟獻世，你以為市民色盲嘅咩！