21/08/2009

播放本新聞相關短片

政情:建制派揀蟀倒劉慧卿

立法會財委會係負責撥款嘅重要機制,每屆每年嘅會議都會爆主席之爭,舊年由劉慧卿爆冷勝出後,卻有聲音話建制派唔滿意佢縱容班泛民主派玩拉布,令個會愈開愈長,密謀再次派人拉劉慧卿下台。

建制陣營入面夠資歷挑戰劉慧卿嘅,以即將卸任資訊科技事務委員會主席嘅梁君彥較得閒,以及喺再下一個年度先接手做發展事務委員會主席嘅劉秀成。不過梁君彥喺建制派入面嘅人緣只屬一般,尤其係唔知富貴黨會唔會撐佢。劉秀成依家係財委會副主席,同唔同黨派嘅關係都幾好,不過亦有建制派擔心佢會變成「翻版呂明華」,成日畀泛民玩,受害嘅只會係建制派同政府。

會計界嘅陳茂波話到明至今都冇人搵過佢出戰,即使有人搵亦唔會考慮,因為佢下年一早排咗好多工作,而且佢個人覺得劉慧卿做得唔錯,睇唔到有必要換人。劉慧卿尋日同傳媒茶敍時,就事先張揚已有唔少建制派議員話會支持佢連任,仲公開鼓勵劉秀成出嚟同佢鬥過添。