盲光社曠世大作品

日前喺互聯網討論區驚現一條《港女m記怒罵愛滋男友》短片，片中有個麻甩仔話試過跟同事北上尋歡，依家知驚喇，擔心惹到周身都係性病，諗住坦白從寬，向女友直認不諱。結果？當然係冇乜好結果啦，女仔猛咁鬧佢污糟，兩個人嗌到拆晒天，鬧到開晒巷。

唉，唔好當啲網民係傻先得o架，呢段片一睇就知係流嘢，不過小白老弟懷疑，段片並唔係由一個「關懷愛滋」嘅組織所拍。唔係講笑，我識幾個女仔，睇完之後發咗幾晚噩夢，開始懷疑男朋友嘅所有男同事冇個好人，全部都係雞蟲；深圳邊有大型購書中心吖，全部都係掛羊頭賣狗肉，實情就係休閒中心！所以小弟有理由相信，呢段片極有可能係盲光社嘅大作。

網友回應

希仔

個男嘅就蠢啦，自古以嚟只有坦白從嚴，嗰條片都錯晒，係咪反面教材呀？

Suki

個女不停「你好污糟！你好污糟！」條片想講乜呀？唔通染到性病就係污糟咁簡單？

Man

聽聞話係關懷愛滋片喎，得個女喺度尖叫，男仔背住鏡，條片都唔知做乜。

OT

好似話係某個劇團所為，畫虎不成反而似老鼠，唉！

了不起

一睇條片就知假假哋啦，兩個成個臨記咁款，叫個女嘅戴番好頂帽先啦。

匿名

佢哋嘅演技真係屎到冇朋友，表達訊息唔清唔楚，睇見都眼冤。

Marco

若真係想關懷愛滋，好心唔好搞到咁啦，即係叫人有懷疑唔話畀人聽，繼續傳畀人。

張良

整套咁嘅嘢出嚟，係咪想教人點歧視呀？

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。 網址：www.sunsiupak.blogspot.com