十個女人九個貪靚，立法會議員余若薇（Audrey）出名識扮靚，亦令立法會多咗啲婉柔味道。不過，酷愛長裙、各種各類首飾同紅橙黃綠青藍紫鮮艷顏色嘅佢，卻大嘆冇接班人，事關三個囡囡嘅衣着品味完全唔似佢，佢為囡囡買嘅衫分分鐘被彈番轉頭，搞到佢好冇癮。
Audrey話囡囡細個時成日都有幫佢哋扮靚，但稍為大個啲「脫離佢嘅魔掌」後，衣着打扮就好似專登要同媽咪作對咁，終日都係T恤牛仔褲，顏色就算唔係黑色都係淨色。最近，佢哋一家五口坐郵輪遊波羅的海，船上有餐晚飯規定要formal dressing（正裝），終於畀佢十幾年嚟第一次見到三個女一齊着裙，當場感動不已。