呢個暑假好精彩，繼富貴黨遊西藏、建仔去廣東省後，工聯會都唔執輸，後日會上北京舉行路向營，順便搵啲熟悉國情嘅人士補吓課，消息人士話明完全冇上京見領導人嘅性質，外間無謂揣測。
據講呢個集思會主要係新成立嘅政務委員會首次離岸會議，一行十幾人，有會長鄭耀棠、立法會黨團召集人黃國健、陳婉嫻，同埋幾位立法會議員和部分地區骨幹成員。
工聯會嘅政務委員會可以講係一部選舉機器，北上腦震盪，二○一一年區議會選舉相信係主菜之一，另外又會總結過去一年立法會嘅形勢同運作，同埋思考未來路向咁。咁多議題，冇兩、三日都傾唔晒啦！
