立法會議員成日畀人戲稱為尊貴嘅議員，所謂尊貴，當然係比較番同樣有議員稱號嘅區議員啦。立法會旅遊界代表謝偉俊（Paul）日前去沙田了解有七十年歷史、已成旅遊點之一嘅龍華酒店設施問題，遇到居民向佢投訴對開天橋梯級太高，居民出入不便等，阿Paul一時之間唔知點應付，陪佢落區嘅白姐姐就好似變身女超人咁護住阿Paul，語氣強硬咁「教」居民：「佢唔係呢區o架，妳去搵區議員啦！」
街坊梁小姐話日前黃昏時段，見到阿Paul同白姐姐企喺龍華酒店嘅梯級上，於是走埋去同阿Paul反映條橋啲梯級好高，希望可以安裝升降機，等公公婆婆唔使行得咁辛苦。點知阿Paul只係眼定定咁望住佢冇反應，但白姐姐就出言教訓佢。
事後梁小姐質疑阿Paul係咪「啞咗」，甚至要搵代言人。阿Paul就話事件只係場誤會，當時佢集中精神諗緊橋，又覺得件事九唔搭八；至於白姐姐都係想保護佢啫，而且搵區議員都係正確指示呀。