平叔尋日出席一個電台節目時話，至今都搵唔到另一把歌聲可以好似鄧麗君嘅歌喉咁，聽到佢成個人軟綿綿，而令佢最感觸嘅歌就係《但願人長久》。平叔推薦嘅歌取自蘇軾《水調歌頭》嘅詞，可以話係千年難得佳作，做高官嘅人會因為「高處不勝寒」、「今夕是何年」嘅詞而生感慨；情人們又會為「但願人長久、千里共嬋娟」嘅綿綿情意打動；一般小市民可能要感嘆「人有悲歡離合，月有陰晴圓缺」。

「抗毒切忌急功近利」

點解醉心佛學嘅平叔會為呢首詞咁感觸呢﹖佢話自己雖然學佛，但做人仍然好入世，間唔中仲會講嘢得罪人添。離開錄音室後，佢講起校園驗毒又開行火力，話抗毒係一場漫長而複雜嘅戰爭，時間唔係以月份計算，應畀市民多啲參與，「切忌急功近利」。講到呢度，平叔話鋒一轉：「但係我感覺唔到政府做咗（畀市民參與）囉！」

佢仲話，政府醞釀中嘅驗毒計劃爭議好大，唔明點解政府用家吓嘅手法推行呢個巨大嘅社會工程，但政府嘅諮詢明顯好不足，所以社會先至有咁大反彈。