港府多個部門尋日喺荃灣一間中學開最後一場禁毒教育研討會。講真,呢啲騷做咗N咁多次,有冇成效,政府雞食放光蟲,心知肚明啦。與會教師提出問題一大堆,但好多都得唔到明確答案。
慳番啖氣好過啦,查實連政府高官對應該點做都矇查查。呢嗱,食衞局局長周一嶽前日又爆歪論嘞,話學生抗拒驗尿可能係唔習慣,「唔想有人跟住去廁所攞樣本,但運動員好多時都習慣咗驗尿,相信過一段時間佢哋會較為習慣」。
叮!周一鑊為咗硬銷校園驗毒計劃,真係懵到上腦,計劃好多細節都未清楚,驗尿流程未有定案。有關注團體人士話,計劃係自願,唔可能有醫護人員跟住學生入廁格攞尿液樣本。計劃本來就爭議多多,自己無知不特止,仲叻唔切玩老作,冇嗰樣噏嗰樣,唔通嫌周一鑊個名唔夠響,要做埋「周阿茂」?
有網上反驗毒計劃學生組織召集人話,運動員驗尿係為確保比賽公平,但學生驗尿係基於唔信任,根本冇得比較,質疑「是否被人剝削及侵犯私隱都要習慣」?唔該班高官聽吓市民聲音,咪再自己呃自己啦。
毒品入侵校園愈來愈嚴重,政府抗毒,市民絕對唔反對,但問題搞到今日咁嚴重,完全係因為當局堵截毒品來源嘅工夫做得唔夠。民政事務局局長曾德成尋日承認,二十一歲以下吸毒者人數過去四年增長咗五成七,間接證明政府打擊不力啦。
解決青少年吸毒問題涉及範疇好廣,對學校同學生更加影響深遠,必須從長計議,唔能夠拍心口話上就上。如果未有足夠法律依據同相應嘅配套措施,事倍功半唔在講,甚至可能因為面對法律挑戰,最終要慘淡收場。連律政司司長黃仁龍都承認政府喺推出計劃上有不足之處,證明當局根本冇用腦諗清楚有關措施行唔行得通。
叮!話到尾,青少年吸毒之所以氾濫成災,係因為政府一向唔爆煲就當問題唔存在,以往根本無心去解決。直到A學校有人集體索K,B學校又發現有小拆家,連傳統名校都無可幸免,當局至知驚,拿拿臨提前實施校園驗毒計劃,有理冇理做場大龍鳳至算,呃得幾耐算幾耐,結果到依家都攞唔出令人信服嘅具體措施。
周一鑊嘅驗尿歪論,證明連政府自己都唔知應該做啲乜,研討會一場接一場,噏嚟噏去三幅被,無非想騷自己有做嘢啫。咁嘅會再開一百場都唔會有結果,仲研乜鬼討吖,收皮罷啦。叮!