本文重點
一個全新的報上部落格,每日與你暢談社會至Hit話題,剖析問題所在。
版主感想
抵唔住頸手尾長
唔知大家有冇試過飲茶時,隔籬有大班三姑六婆喺度嘈喧巴閉,慌死冇人知佢老公喺上面包咗個二奶咁。遇到咁惡劣嘅情況,的確係幾唔好彩,佢嘅茶錢唔會畀多過你,點解你要坐喺度受氣呢?冇錯,呢個時候,唔係話唔可以拎手機出嚟拍低「茶樓阿姑」嘅YouTube紀錄片,但要小心佢哋原來有鋪上鏡癮,搔首弄姿唱埋齣折子戲你聽,咁就手尾長喇!
仲有呀,雖然依家天口熱,但大家切記喺任何情況底下,都萬萬不能車個茶壺過去,呢個係刑事罪行,隨時要坐監㗎!到時嗰位師奶包住紗布,特登約埋六姑十二婆同八個老公一齊嚟探你,講得仲大聲都得呀!呢個時候,你總算參透老董嗰句名言:「離開容易,留低困難」,總算係一個得着!
網友回應......
C+偵探
柏楊講得真係冇錯㗎,中國人一味只係識得髒、亂、吵,冇得救㗎喇。
Cyril
真係難以明白,有咁多點心食,把口應該好唔得閒至啱㗎,為乜仲有咁多嘢講?唔通識得腹語?
Fed
港式茶樓夠嘈至有味道,以前喺外國留學,喺鎮仔落酒吧,得小貓三幾隻,個個好似啞咁。
關人
相嗌唔好口,由佢哋嘈啦,一有乜嘢口角,都係麻甩佬蝕底,佢哋夾埋話你非禮真係水洗都唔清。
jenny
其實何止係茶樓吖,巴士、火車都勁嘈,最把火嘅係嗰啲試鈴聲嘅人,好心香港人有啲公德心啦。
才子
所以我哋呢啲高等華人絕對唔會去Cheap Cheap港式茶樓,寧願去星乜克飲幾十蚊嘅Latte。
Leicamania
我比較過台北、廣州同香港嘅茶樓,發覺香港茶樓分貝特別高,可能係廣東話嘅問題。
佳佳
劃個師奶區做埋隔音畀佢哋坐囉,噪音區嘅侍應配備耳塞一對。
版 主:小白
銜 頭:評論員
特 徵:路見不平,Blogger相助