黃仁龍上任多年，隨口噏都可以數到一大堆引起社會各界爭議嘅決定，遠嘅有竊聽官司同之後嘅立法爭議，近嘅有放生喺香港打人嘅津巴布韋總統家眷保鏢，以及最近嘅校園驗毒爭議等。

黃仁龍出任青少年毒品問題專責小組主席，小組喺報告中提議嘅校園驗毒計劃，依家已證實漏洞處處，不但引起部分學校、教師同學生反對，私隱專員吳斌同兩個律師會嘅阿頭，最近更先後踢爆計劃有好多法律問題，可能侵犯私隱同人權，連黃仁龍佢自己前日都不得不承認計劃有不足。佢作為特區政府嘅問責司長兼首席法律顧問，預先睇唔到呢啲政治同法律問題，表現簡直可以講係唔合格。