悠長暑假中，好多學生哥都會做暑期工賺啲學費，立法會會計界代表「波波」陳茂波都幫喺英國讀法律嘅仔James搵咗份律師行見習生嘅暑假工，希望佢趁暑假吸收吓人生經驗。波波仲憶述自己當年喺工廠燙恤衫袖口暑假工嘅經驗，話呢份做咗一個月嘅工雖然又焗又熱，環境好差，但亦因為咁，嚇到佢第二年搵暑期工要揀份環境好嘅會計師樓工作，自此入咗呢行。
波波當年嗰份暑期工，行內術語叫「焗雞英」，即係用焗機燙恤衫袖口，等袖口硬淨啲。部焗袖機器溫度好高，佢做緊嘢時，身體好似不停吸熱一樣，一日工作之後，夜晚佢要瞓地下，等涼浸浸嘅廉租屋水泥地板幫佢吸走身上啲熱力。
翌年暑假佢已考入大學，諗起呢份熱辣辣嘅工都有啲驚，於是入咗環境較舒適嘅會計師樓工作，自此人生路同會計再分唔開。所以，佢認為做暑期工好重要，可以訓練年輕人刻苦耐勞。