天文台台長李本瀅喺最新一篇網誌中透露，政變同天氣原來密切相關，本月一號菲律賓前總統阿基諾夫人逝世，佢因而諗番二十三年前一次值夜班嘅經歷，發現一個地方發生重大事故時，天氣圖唔多唔少可睇出端倪。
李本瀅記得，一九八六年二月二十四號係菲律賓人民革命嘅前夕，當時佢身為天文台預報員，負責分析由世界各個觀測站送嚟嘅地面觀測天氣圖。佢話菲律賓嘅觀測資料由午夜開始減少，到清晨更加疏落，第二朝八點幾，已係全球氣象觀測嘅主要時間，但菲律賓二十多個觀測站中只有馬尼拉有資料顯示，佢隱約覺得當地或有問題。
結果冇耐新聞報道就話阿基諾夫人當日朝早正式就任總統，前總統馬可斯當晚匆忙離國，乘搭美軍直升機遠走美國，到咗二十六號，菲律賓所有觀測站先有番觀測資料。唔知呢個發現喺其他地區靈唔靈呢？