富貴黨前副主席「莎姐」周梁淑怡闊別政圈近一年後，九月將會復出，不過佢唔係從政，而係幫電視台主持星級訪談節目，個節目打正佢嘅名叫《周梁有請》，莎姐仲換個髮型，一於大變身露面。節目訪問對象有冇兩位疑似特首候選人唐唐同梁振英㗎﹖佢顯得成竹在胸，但就唔肯透露佢哋嘅訪問幾時會出街。
莎姐搵咗老友星級髮型師Kim Robinson友情贊助為佢整頭，電咗一頭鬈髮，佢自己好滿意，話以前又直又短嘅頭髮太中性，仲擔心同蘇施黃愈嚟愈似樣。離開政圈一年，莎姐似乎一啲都唔戀棧，除咗陪老公、兩個孫女外，佢仲抽時間為創意香港辦公室做顧問，今次做節目都話唔可以佔用佢太多時間。
為咗今次復出，莎姐摷番佢多年前嘅舊相出嚟，連佢入無綫做天氣女郎嘅舊相都有，睇真啲，莎姐嘅形象都可謂十八變。