尋日會議後，粵港就一啲項目簽訂咗合作安排同意向書，黃華華仲透露，好快有個「粵港澳更緊密合作決定」嘅文件出台，為粵港澳更緊密合作制訂框架。大家問煲呔曾香港有乜部署時，佢顧左右而言他，兜大個圈講埋粵港合作冇分前前後後嘅廢話，一啲實質答案都冇，好明顯港府又一次後知後覺啦！愈講愈冇料之下，煲呔曾忽然以「舞功」遮醜：「我哋根本同黃省長（黃華華）兩方面係好合拍嘅，我哋行一步，大家走一步，實情係一齊跳Tango咁。」

邊個帶舞好關鍵

近年探戈喺本港社交舞圈子好潮，連知名銀行大班都要交天價學費去學，所以識舞之人一聽就知煲呔曾亂晒龍，事關源自阿根廷妓院、有挑逗意味嘅探戈係一方帶舞、一方配合嘅舞步，傳統係男性作主導，煲呔曾以呢個舞嚟比喻粵港合作，邊個帶舞好關鍵噃！

偏偏佢話「我哋行一步，大家走一步」，似乎佢當時想講香港行第一步，廣東省跟一步，話到嘴邊，又醒起冇理由話廣東省跟住香港，夾硬變咗「大家走一步」，如果真係跳舞嘅話，呢一變實亂晒龍啦，點合拍呢？難怪煲呔曾講完之後，被喻為跳舞好合拍嘅黃華華一啲表示都冇，唔知係聽唔明佢嘅廣東話，定係根本唔覺得呢一Part舞好合拍，總之煲呔曾又衰咗，好心佢下次唔好亂拋啦！