港鐵劏客手起刀落，爽過自家製手打牛筋丸。有乜理由九龍南線通車後「短程貴、長程平」的票價問題愈揭愈多？除了西鐵線出現「短程貴過長程」外，荃灣線及東涌線亦有此問題。譬如南環線由南昌站坐兩個站到尖東，單程車費六蚊，多搭一站到紅磡卻只需五蚊。唔通尖東落車就富貴啲，規定要畀多一蚊？

今次港鐵收費系統大混亂，又歸咎於「歷史遺留的問題」。尖東出閘比紅磡貴，港鐵發言人話「日後調整票價時會考慮作調校」，日後即係幾時？五年？十年？錯了為甚麼不可以盡快更改？歷史幾荒謬都有。好似康熙給「靈隱寺」題字，把個靈字上面的雨字頭寫大了，下面不夠寫了，於是臣子就出主意改題為「雲林禪寺」；又如乾隆不知是老花還是近視，把「滸墅關」看成「許墅關」，把「西川」看成「四川」，大臣們就把名都改了，將錯就錯，一直沿用至今，反正皇帝是不會錯的！

港鐵不即時調校畸形票價，不正是「皇帝上身」？乘客被劏，要乖乖引頸就戮。港鐵深明善與惡是同一回事，醫生們用各種辦法燒、割、折磨病人，卻向病人索取報酬；或者港鐵視短程、長程都在圓周上，終點就是起點，冇得計較！