錯錯錯！太一叮講緊嘅太空餐廳，係指專攻外賣市場嘅無牌食肆，呢啲食肆以假地址作掩飾，實際以公屋單位作「廚房」，簡直比太空更深不可測。遠在天邊、近在眼前，各位公屋住戶隔籬可能就有一間呀！

話說近排喺觀塘以及大角咀出現咗多間「太空餐廳」，有位住油塘嘅讀者試過打電話去叫外賣，足足等咗成半個鐘至送到。佢見食物凍晒，於是跟住外賣宣傳單張上面嘅地址上門理論啦，冇錯係搵到間舖，不過唔係餐廳，而係一間美容院。

唔通依家啲美容院要多元化發展，連餐飲生意都撈埋？當然唔係啦，原來呢間美容院被人借咗個地址過橋都唔知，直至有人上門找晦氣至如夢初醒。老闆無辜成為代罪羔羊，唔嬲就假，佢話已經報埋警添。

報警有鬼用咩，又唔係關乎警察爭薪嘅切身利益，佢哋梗係闊佬懶理啦。本報記者幾經明查暗訪，卒之發現呢間太空餐廳所在地，原來唔係幾百萬光年以外嘅星球，竟然係秀茂坪一個公屋單位。

唔係啩，竟然有人咁明目張膽喺公屋開私房餐廳？乜唔係有個公屋扣分制，寫明如果將出租單位用作食物製造工場或倉庫，房屋署可即時檢控租戶並且扣七分，兩年扣滿十六分就會被終止租約咩？

最弊係房署明知有人違反公屋條例，依然隻眼開隻眼閉。有接近房署嘅消息人士透露，房署要喺毫無疑點及有足夠證據下，先至可以對租戶作出扣分或檢控，如果唔係，怕畀人反咬一口咁話喎。

叮佢個鎯鎯，依家擺到明有人喺度搞「公屋廚房」啦，房署做嘢仲要畏首畏尾，唔通要等到成幢公屋家家戶戶喺冷巷炒蝦炒蟹做大牌檔至算係有足夠證據咩？

房署固然係卸膊，但講到最縮骨嘅，一定非食環署莫屬啦。該署推三推四話傳單上嘅係假地址，得個電話號碼好難跟，話毫無頭緒喎。叮，卸膊都要卸得合理啲o架，本報六月中舉報，直到依家差唔多成兩個月都冇人理，食環署明明知道太空餐廳嘅地址喺邊，要跟點會跟唔到吖，懶就懶啦！

食咗呢啲來歷不明嘅食物，後果可大可小o架。傳染病專科醫生勞永樂警告，無牌食肆供應嘅食物，製造過程同埋衞生情況冇監冇管，真係乜菌都有可能，傷寒、大腸桿菌、金黃葡萄球菌等，中咗招隨時死得人o架！

講到底，一日都係食環署署長卓永興失職，管食物管到甩甩漏漏，將小市民健康置之不理。計太一叮話齋，最好叮佢出外太空，唔使留喺地球上害人累物！叮！