版主有話說...m^o^m...

咪咁笨放過醫管局

伊利沙伯醫院發生離奇調錯B事件，搞到兩對夫婦照顧咗人哋個女幾日，院方話佢哋深感困擾同埋好唔開心，要接受心理輔導。

咁荒謬嘅事情，為人父母當然係接受唔到啦！試想想，一般生咗個B之後，第一時間會做啲乜呢？仲使講，梗係話似爸爸多啲定似媽媽多啲，本來兩家人歡天喜地，講到個B十足十餅印，突然間話原來係人哋嘅產品，同自己毫無血緣關係，你話幾瘀皮呢？

此外，就算個B回到自己身邊，亦都有可能覺得口味唔啱而罷食，所以小白老弟奉勸一句，千祈唔好咁笨放過呢班友，唔當作精神賠償，至少都要畀番幾日奶媽費啩？一於告到醫管局甩褲，賠到佢翻艇呀！

網友回應...X）...

[晶晶]

有乜理由咁都錯得吖，以後唔敢生仔。

[成才]

香港醫院質素真係差，一係就調錯B，一係就連條屍都唔見埋，信佢哋就慘啦。

[海娜]

有晒手帶都無用，要調錯始終都錯，都係生完放番阿媽房穩陣。

[阿慈]

生仔都夠辛苦啦，生完仲要驚個B唔係自己嘅，依家做母親真係少啲心血都死。

[肥仔]

今次調錯B，可能影響人哋一生㗎，以後個對父母有陰影成日以為個仔唔係佢嘅，醞釀好多家庭悲劇都唔定啦。日子耐咗仲可能會精神失常，你話怨邊個吖。

[海美]

幫人養咗幾十年仔至知仲慘，自己個仔又唔知去咗邊，人生可笑莫過於此。害咗人哋一世呀！

[晴朗]

因為餵錯奶搞到人哋母親有產後抑鬱，產後抑鬱可以好嚴重o架。一個疏忽，影響成家人一生，醫管局點負責吖。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。 網址：www.sunsiupak.blogspot.com