港府推動嘅校園驗毒計劃畀人鬧到飛起，宗教界、教育界幾乎齊齊舉行反對大合唱，政府方面，卻顯得勢孤力弱，嚟嚟去去只見教育局副局長陳維安出來擋飛箭，左支右絀下，周身都中箭。搞成咁，皆因政府兩個主力抗毒嘅教育局局長孫明揚同保安局局長李少光不約而同放暑假，兩局真空所致。
孫公喺暑假中都忙到飛起，直到署理政務司司長完畢先申請放假三個禮拜，咁啱咁蹺，李少光都攞咗五日大假，其中一日即前日（十七日）更係光哥嘅生日添，或者順便放假慶祝生日啩。
李少光嘅新聞秘書補飛話，保安局雖然無副局長，不過局長呢次放假做足準備，萬一有事發生，都有常秘張琼瑤主持大局甚至出席政府高層早禱會，局長亦會長開手提電話，一見勢色唔對就趕返香港，所以唔驚會重演包機事件喎。