豬流感肆虐嘅時候，政府搞咗個全城清潔大行動，並由政務司司長唐英年（唐唐）領軍，尋日唐唐就出席咗「全城動．義工響應全城清潔運動」嘅開展禮，仲做騷式帶領一眾嘉賓抹展板，點知佢哋抹極都唔乾淨，場面真係又好笑又醜怪。
唐唐尋日除咗負責致辭外，仲要幫個活動主持啟動儀式。大會安排嘅啟動儀式幾特別，要一眾主禮嘉賓倣效抹窗，用海綿同百潔布一類嘅抹布抹乾淨一塊黃色嘅板，原本嘅設計係大家抹吓抹吓，咁「全城清潔運動」嘅標誌就會重現大家眼前。
平時好少有機會掂到清潔用品嘅唐唐，就同其他嘉賓一齊好落力咁喺塊黃板上面抹呀抹。
唔知係因為大家少抹窗，定係個儀式嘅設計有問題，包括唐唐在內嘅七位嘉賓抹極都抹唔乾淨，個標誌久久都未能露面，擾攘咗成分鐘先完成個啟動儀式。