立法會議員雖然成日畀人叫尊貴嘅議員，但佢哋嘅操行表現卻唔多見得人，流會、隱形、遲到早退之外，連定期同十八個區議會議員會面嘅安排都無法如約，試過有次會面爆出八個議員齊齊甩底嘅鬧劇，搞到區議會好冇癮，覺得唔受尊重，呢班尊貴議員真係有必要檢討吓。
立法會每隔一段時間，就會同每個區嘅區議員會面同食飯，一般立法會方面有十四名當值議員出席會面，但今年七月初，議員同九龍城區議會會面時，有八個議員齊齊甩底，去年三月同屯門區議會會面，議員嘅出席率亦唔見得人，令兩個區嘅區議員非常火滾，試過會面連法定嘅五個人都做唔到。
立法會秘書長吳文華尋日更向全體議員發出諮詢文件，除咗建議調整時間外，仲建議今後除咗十四名當值議員之外，五名喺立法會申訴部當值員，亦有責任出席有關會面，希望合共十九名議員搵到五個人見吓班區議員，咁樣有冇效真係好難講，或者引入罰錢、減人工甚至公開譴責等措施會好啲。