香港城市橋牌錦標賽尋日揭幕，城中一眾橋牌高手先來一場名人邀請賽，計有前環境運輸及工務局局長廖秀冬胞兄廖約克以上屆冠軍姿態參賽，前立法會議員李家祥、土木工程拓展署署長蔡新榮以及中華總商會會董黃守正亦以橋牌老手身份落場對決。沙士抗疫英雄鍾尚志醫生臨時有事甩咗底。
名人牌局分成七組對決，廖約克以上屆盟主姿態出戰，可惜舊年同佢拍檔嘅三個牌腳有事冇參賽，同場又遇着兩位攞過世界橋牌錦標賽冠軍嘅勁敵，難怪佢話衞冕信心只係一半半。
李家祥尋日首次參賽，但原來佢五歲已識得打橋牌，喺英國讀中學時更跟埋老師參賽，但入大學後嗜好太多，冇再打牌，近年喺世界橋牌聯盟副主席蔡國雄游說下，覺得打橋牌有助預防患上老人癡呆症，決定再玩。尋日更帶埋初學打牌嘅太太Omelia一齊落場，李太全程匿埋老公身後陪打牌，煙韌到極。不過，一眾名人都空手而回，由蔡國雄成為冠軍。