鋪路進軍直選

吳揪得本來擔任醫管局資訊科技培訓經理，保守估計月薪至少五萬元，佢放低IT專業做工會工作，點講都係由白領走向藍領，如果話冇經過深思熟慮，都好難令人信服。睇番吳揪得呢四個零月嘅經歷，好似入咗一道又一道旋轉門咁。

年初喺工聯換屆選舉中，佢以名不見經傳嘅工聯會後起之秀，輕易揪低其他大熱同黑馬，當選理事長，平地一聲雷成為工聯新星。家吓放棄原本嘅高薪厚職，何嘗唔係為將來進身立法會議員、喺政壇打滾做準備呢？

佢呢個統率三十三萬工聯會眾嘅工聯理事長係受薪職位，月薪僅約三萬元至五萬元。不過，呢個位絕對係過渡性質，因為工聯會家吓嘅政治實力與日俱增，吳揪得等新秀嘅冒起正為將來進軍直選鋪路。過去三個幾月，佢一直以兼職身份管事，要統領咁大個會實在唔容易。

家吓佢辭咗份工，九月一日開始做全職大總管，進身政壇嘅路，似乎同佢嘅前任黃國健差唔多，至於循工會定直選就暫時難講。他日如果成功進身政壇，立法會議員嘅人工連津貼每月超過十萬元，勉強都應該可以補番條數啦。不過，吳揪得做咗大總管後同勞工新聞行家有傾有講，對政治線記者就至今未敢聚一聚，呢個作風真係唔改唔得，否則點食政治呢行飯呀？