話說六十歲嘅陳太喺○三年被確診患有大腸癌，經過手術切除之後，雖然保住條命，但好唔好彩，自此失去排泄能力，要依靠便袋排便，每日至少要換三個便袋，如果撞啱腸胃唔妥，一日要更換六、七個袋。

小數怕長計，每個便袋十四元，單係維持正常排便，一個月用喺買便袋、棉花以及消毒用品嘅支出，就要成一千五百元。

按照政府規定，病人如果肢體殘障、器官殘障、雙目失明、心智機能嚴重缺陷以及聽覺極度受損等等，殘疾程度令病人失去咗百分之一百謀生能力，可以申請一千二百多元嘅普通殘障及二千五百多元嘅嚴重殘障津貼。

陳太手上都有張政府發出嘅永久傷殘證，點知佢向醫生索取證明時唔單止被拒，醫生仲好冷血咁話佢有手有腳，可以照樣返工，仲質問佢為乜要同人爭社會資源。

叮佢個鎯鎯，係人都想活得健健康康，你估人哋貪嗰啲津貼咩？既然當局以小人之心度君子之腹，不如直接提供醫療用品畀病人啦！

醫管局發言人指津貼主要由社署負責，但社署就死撐話申請人要經過衞生署署長或醫管局行政總裁證明。叮！有病已經好慘啦，社署同埋醫管局仲要將病人當人球踢來踢去，分明係互相推卸。

講到尾，一日都係當局做嘢甩皮甩骨，兩年前將「器官殘障」列為可申請津貼項目，至今仍然未有制訂一個客觀標準，搞到部分符合資格嘅申請者攞唔到援助。

其實陳太嘅個案只不過係冰山一角，長期以來，當局對於傷殘人士喺生活以及工作上遇到嘅困難視而不見，唔好話有手有腳嘅唔批，有嚴重肢體傷殘嘅都唔批呀。

試過有一個鏟車操作工人因工傷意外切咗一隻小腿，只能靠輪椅代步，當佢向社署申請傷殘津貼時，對方竟以「單肢殘障未達到百分百傷殘」為理由拒絕，冷酷無情成咁，真係世間少見。

最弊係社署審批一時一樣，標準次次唔同，成日都出現應批嘅唔批，唔應該批嘅就批呢啲蝦碌嘢，有時甚至連已經去世嘅人都有份。呢嗱，一位已經去世嘅年輕失聰人士，在生時又唔見有人對佢咁好，直至佢仙遊之後，勞工處話要安排佢見工，社署竟然畀埋高齡津貼佢，當局都唔知攞景定贈興！

叮，連咁簡單嘅審批工作都搞到一塌糊塗，而且做得咁刻薄冷血，睇嚟社署同埋醫管局內大把人有腦殘問題。不過由於聶德權新嚟新豬肉，冇辦法，一定要叮爆佢嘅鎯鎯，等佢以後記住醒醒定定做好呢份工！