一個全新的報上部落格,每日與你暢談社會至Hit話題,剖析問題所在。
漏氣水泡咪嘥時間
毅進課程呃咗萬幾人去報讀,當堂拉低咗青少年嘅失業數字,相當止得咳,當局於是再接再厲,再大派「展翅」水泡。之不過,學生哥冇書讀又搵唔到工做,唔想畀人叫「雙失青年」咁難聽,用嚟Kill Time戒索K都可以,不過如果諗住讀完之後可以學以致用,以為出到去勞動市場大把人爭住請,咁就唔好嘥時間嘞。
日前咪有個奶茶王新鮮出爐嘅,佢沖咗二十年茶至有咁嘅成就,夠厲害啩?咪又係冇嘢做等運到!據講有個同學仔報咗整餅課程,傻吓傻吓咁讀咗幾個月,竟然連麵粉都未搓過。唔識整餅問題唔大,報讀髮型嗰啲九成九連飛髮鉸剪都未用過,出到去同客人剪髮,隨時免費加送剪耳仔,髮型屋老闆要請多兩個上過護理課程嘅展翅畢業生至得囉。
網友回應
亨利
政府成日開埋呢啲水泡課程,嘥學生錢嘥時間,為咗人人有水泡,弊在個水泡漏氣嘅呢,唔湯唔水仲慘。
大雄
嘥自己時間又嘥阿媽啲米飯錢,不讀也罷。
秋霞
你估參加完計劃可以飛咩!就係飛唔起先改個咁嘅名安慰吓你,大學生都冇得撈啦,何況半鹹淡嘅「剪翅」?
懶人
點解唔開吓啲風水同按摩班,呢啲至叫做一門手藝!
小林
讀完大學都未必有工做,展翅畢業生出路唔多,真係讀又死唔讀又死。
醜小鴨
若展翅開辦G模課程,或者會吸引多啲女生去讀。
聰仔
真係唔好靠晒乜乜展翅、青見呀,僱主認唔認受先?政府有冇開職位專畀展翅青見學員先?乜都冇,咪又係要同班大學生高專生火併爭飯碗。
森哥
哈,有風水班嘅話,我都走去報吓,發達就靠佢喇!
發表方法
讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。 網址:www.sunsiupak.blogspot.com