十四粒星？原來係講緊法國米芝蓮星級食肆指南嗰啲星。佢哋一行人喺短短六日內，馬拉松式先後幫襯咗兩間米芝蓮三星食肆、四間兩星食肆，加埋就有成十四粒星咁多。Stephen大讚嗰兩間三星食肆貨真價實、名不虛傳，絕對係不枉此行。

重遊母校感觸良多

喪飲喪食外，Stephen仲重遊三十五年前讀過嘅牛津大學Worcester學院。佢係當年港英殖民政府首批保送去英國進修嘅年輕華人政務官之一，如今重遊舊地，真係感觸良多。旅程期間，途經Abbey Road斑馬線，令人諗起四十年前紅極一時嘅Beatles大碟《Abbey Road》，見佢雙手插褲袋過馬路個款都幾有型喎，彷彿回到當年！