煲呔曾每年都會喺發表施政報告同北京兩會召開前，分別同啲港區全國人大同全國政協委員會面收集意見，其中施政報告嗰次一般會喺政府總部舉行，兩會前嗰個就喺禮賓府。
禮賓府喺上亞厘畢道，而政府總部就喺下亞厘畢道，話說煲呔曾尋日就今年嘅施政報告進行諮詢，港區全國人大費斐都有份出席，但佢嘅座駕駛咗入上亞厘畢道嘅禮賓府，落車先知道原來去錯地點。
呢次都算大頭蝦囉！竟然搞錯地點，佢見勢色唔對，時間又好掹水，一向好守時唔鍾意遲到嘅費斐只有一個方法可以做，就係喺禮賓府截的士，飛的士趕落下亞厘畢道嘅政府總部西翼。雖然上、下亞厘畢道嘅距離一啲都唔遠，坐的士掟個彎就到，直情唔使跳錶，但因為咁無端端唔見咗十八蚊，睇怕最開心嗰個係載佢嗰位的士司機。
查實費斐呢次都唔使咁緊張吖，事關最緊張嘅唔係佢，而係等緊佢出席嘅煲呔曾。點解？因為煲呔曾驚見到好多空櫈囉！