唔知係煲呔曾近年民望急跌自己知衰吖，定係因為佢背脊畀人篤到穿晒窿，想唔做番啲嘢補鑊都唔得，今年佢特別將同港區全國人大嘅會面列做施政報告諮詢會嘅頭炮，佢喺會上表現出嘅態度亦一百八十度轉變，表現得好有誠意咁聽大家講嘢，有回應有追問，算畀面。
可惜轉變嚟得太遲，三十六名人大中，只有十八人出席，即係足足有一半人唔畀面佢，包括曾經有過唔愉快經驗嘅劉佩瓊同吳亮星。舊年都有十九個人大出席，今年再少一個，出席率再創新低。
對於佢講明今年施政報告會以發展六大產業做主題，大部分與會者都冇陪佢癲，做過行政會議成員嘅陳智思係少數嘅發言者，除暗寸煲呔曾慢幾拍同將啲好意當做耳邊風外，又話今次安排喺政府總部西翼會面，唔係好似上次咁喺禮賓府舉行，選擇非常正確，因為根本唔會有咁多人嚟，搵太大間房傾反而唔方便，再寸煲呔曾冇人畀面，拳拳到肉。