相信大家仲記得喺○七年五月，二十二個泛民立法會議員聯合整咗個「二○一二雙普選」網頁（www.2012us.com），話要提供一個平台畀網民討論吓政改同普選等議題，順便吸納吓年輕選民嘅支持。想當初泛民敲鑼打鼓係威係勢，又整吉祥物熊貓普普、選選，又喺網頁上發起萬人撐傘爭普選，仲誓言要打破健力士世界紀錄，樣樣都話非要二○一二不可。結果呢？撐傘行動只係得五千人去，比預期少成半，仲要喺大半年後畀傳媒踢爆，因為呢幾個數字斷開咗唔合規格，根本冇得列入健力士世界紀錄。

公文袋發牢騷鬼打鬼

心水夠清嘅朋友就會留意到，由上年三月起，泛民冇再提起呢個網站，依家你有興趣上去望一望都太遲嘞，因為個網頁已無聲無色咁摺埋，依家click入去，只見大大個廣告貼咗喺度，話呢個站名正待價而沽。

其實一般網站域名嘅合約都係兩年，到期要畀錢再續約，唔畀嘅話供應商就可以賣畀人。究竟泛民連個網站摺咗都唔知吖，抑或諗住唔聲唔聲摺咗佢就算？咁就要問當事人先知嘞，但淨係睇呢件事可見佢哋爭雙普選只係得把口。

講開又講，飯盒會仲提及過早前流傳嘅五區總辭方案。消息人士爆料話，公文袋喺會上大發牢騷，話從來冇人喺飯盒會提出討論總辭，但就不斷透過傳媒隔空講，係個別人士想玩嘢；而唔少人對總辭都有所保留，認為冇辦法做到變相公投嘅效果。泛民本來就各懷鬼胎，呢次擺明都係鬼打鬼啦！