不過唔使怕，見唔見到茫茫嘅失業大海中心，有好多水泡喺度浮吓浮吓？大啲嗰個叫「毅進」，早前已經有一萬二千人爭住去抓到實，但係呢個水泡一啲都唔平，讀個課程閒閒地要使三萬元。

如果負擔唔起都唔緊要，周圍仲有好多唔使錢嘅「展翅計劃」水泡，聽講話讀完之後，可以提高青年嘅就業競爭力㗎。講就講到好似天花龍鳳咁，實情係咪真係咁止得咳呢？不如聽吓讀過展翅嘅過來人分享吓啦。

有個後生仔會考得一分，聽到展翅計劃咁使得，於是報讀咗個西餅製作課程，希望可以加深對飲食界嘅認識。點知讀咗幾個月，只係學到點樣分辨刀、麵粉嘅種類，莫講話整唔出一個餅，原來連麵粉都冇搓過。佢覺得好似畀人呃咗，得個讀字，一啲都唔實際。佢仲奉勸一句：「如果有朋友要報讀，我一定叫佢唔好。」

叮佢個鎯鎯，展翅計劃好多課程都係有姿勢冇實際，唔係太過理論化，就係太過學術化，仲會令到後生仔有個不切實際嘅期望，以為有張證書，一出到去就可以做師傅。結果處處撞釘，愈嚟愈閉翳。

特區政府當年推出展翅計劃，係用嚟提高青年嘅就業能力，之但係經過咁多年嘅試驗，效果未如理想。展翅計劃嘅報讀人數，喺○七年度開始，每年只有六千三百人報讀，比○六年報讀嘅八千七百人，少咗約三成。

話就話展翅計劃嘅就業率有七成，呢個數字充滿水分，有好多學員畢業後，就算搵到工都同課程無關。好似話有個修讀護理訓練嘅學員，畢業後做咗侍應，但勞工處就將功勞攬上身，當佢係展翅計劃成功就業個案之一。

叮佢個鎯鎯，政府猛咁鼓勵年輕人讀毅進、展翅呢啲雙失青年水泡課程，你估真係咁好死，想佢哋可以學多啲嘢咩，其實只不過係為咗拉低失業率，做靚盤就業數字之嘛。

弊在當局對經濟問題視而不見，成日開口埋口吹水「六大產業」，十畫都未有一撇，對創造就業束手無策。政府除咗用拖字訣外，根本冇乜良方妙計去解決青年就業問題。

據香港大學防止自殺研究中心發現，失業青年嘅自殺率，比起求學或在職青年高出六倍。再咁落去，雙失青年做唔成「未來棟樑」，好易成為「未來城市炸彈」，遲早爆一鑊勁嘅，到時呢班懶懶閒嘅高官就知味道。